Скриените места за капење во португалските реки сега се многу полесни за наоѓање. Новата апликација посветена на речните плажи во Португалија е лансирана за да им помогне на патниците да откријат скриени локации далеку од преполните брегови на Алгарве (Algarve).
Апликацијата, едноставно наречена „River Beaches“, доаѓа во време кога расте интересот за помирни дестинации опкружени со природа, далеку од метежот на популарните плажи. Таа веќе е достапна на Apple App Store, додека набрзо се очекува и верзијата за Google Play. Апликацијата мапира повеќе од 130 помалку познати места за капење во внатрешноста на земјата, комплетирани со фотографии и детални описи на локациите.
Како апликацијата им помага на посетителите?
Апликацијата е достапна на португалски, англиски и шпански јазик, а вклучува и совети од луѓе кои веќе ги посетиле тие локации, за идните посетители да имаат подобро искуство и да знаат како најдобро да уживаат на дестинацијата, пренесува Euronews.
Корисниците можат да користат филтри и да најдат места кои одговараат на нивните желби:
- Плажи со ресторани, паркинг и тоалети,
- Локации кои имаат спасувачи,
- Места прилагодени за деца или за кучиња.
„River Beaches“ ја следи растечката популарност на слатководните бањи, кои сè почесто стануваат алтернатива за преполните морски плажи, особено за време на топлотните бранови. Многу од тие места се наоѓаат во шумовитите планински области на централна Португалија, вклучувајќи ги и подрачјата околу реките Мондего (Mondego), Зезери (Zezere) и Алва (Alva).
Еколошка мисија и дигитална поддршка
Иако апликацијата е бесплатна и без реклами, тимот што стои зад проектот наведува дека 50 отсто од профитот (од евентуални донации или дополнителни функции) ќе биде насочен кон проекти за обнова на реките и задржување на водата ширум земјата, со цел природната убавина на тие места да биде зачувана за идните генерации.
Португалија веќе има развиена култура на апликации посветени на плажите и условите на водата. Долгогодишната апликација на Vodafone – „Praia em Directo“, веќе обезбедува податоци во реално време за десетици португалски морски и речни плажи, вклучувајќи го квалитетот на водата, температурата и информациите за спасувачките служби.
Извор: odrzime.rs
