„Колку повеќе облека имате, толку е поголема веројатноста да се чувствувате по малку изгубено, да доживеете замор од носење одлуки и уште поинтензивно да го имате чувството дека ‘немате што да облечете’“, изјави за Vogue Ортенс Прувост, директорка за влијание во компанијата Vestiaire Collective. Повеќето испитаници го припишуваат тоа чувство на емоционална неповрзаност со сопствената гардероба, додека истовремено го потценуваат бројот на парчиња што ги поседуваат за околу 45 до 50 отсто, што значи дека многумина од нас всушност и не знаат што сè имаат во плакарот.
Можеби и не изненадува тоа што типичната реакција на чувството дека немаме што да облечеме е купување на нешто ново како „брзо решение“, при што 89 отсто од луѓето велат дека го направиле тоа барем еднаш. Сепак, како што истакнува Прувост, „тоа обично само го засилува тоа чувство, а не го решава навистина“, пишува British Vogue.
Интересно е што извештајот покажал дека оние кои учествуваат во препродажба, било преку купување или продавање, поретко го доживуваат чувството дека немаат што да облечат. „Сите мораме да бидеме промислени кога купуваме“, додава Прувост. „Купувањето половна мода многу се разликува од влегувањето во продавница или купувањето нова облека онлајн. Мора да имате идеја за брендовите што ги сакате, да ги прегледате понудите, да комуницирате со продавачот, да преговарате за цената. Сите тие чекори создаваат поинаква поврзаност со гардеробата“.
Пред да побрзате во купување, Прувост советува прво да направите преглед на плакарот за да согледате што навистина поседувате и што всушност носите (истражувањето покажало дека испитаниците во просек имаат облека во вредност од околу 800 фунти која никогаш не ја носат). „Најпрво стекнете јасна слика“, вели таа. „Ослободете се од она со кое повеќе не чувствувате поврзаност, за да можете да се фокусирате на парчињата кои навистина ви значат во секојдневниот живот“.
Извор: odrzime.rs
