Споменикот на рамнината Салисбери во англиската област Вилтшир е граден во фази, почнувајќи од околу 3000 година пред новата ера, а посебен интерес кај истражувачите сега е насочен кон таканаречениот „Altar Stone“ (Олтарски камен), камен кој се наоѓа во самиот центар на комплексот.
Според новата студија на истражувачите од Универзитетот Куртин во Австралија, овој камен потекнува од североисточна Шкотска, а неговиот пат до денешната локација бил значително подолг и посложен отколку што се мислеше претходно.
Леденото доба и човечката интервенција во иста приказна
Анализите на геолошкиот состав и моделите на движење на ледените плочи покажуваат дека глечерите за време на последното ледено доба можеле да го пренесат каменот до подрачјето Догер Бенк во Северното Море, оддалечено околу 300 километри од денешниот брег.
Меѓутоа, тој природен транспорт не бил доволен за каменот да стигне до јужна Англија. Според истражувањето, остатокот од патот, околу 400 километри, морал да биде поминат со помош на луѓето од праисторискиот период.
Тоа би значело дека древните заедници, користејќи ги тогаш достапните методи, организирано го преместиле огромниот камен низ тежок и непознат терен.
„Огромен потфат за тоа време“
Коавторот на студијата, Ентони Кларк, истакна дека ваквиот потфат укажува на високо ниво на организација и планирање кај праисториските луѓе.
„Нашите резултати покажуваат дека глечерите можеби го пренеле каменот дел од патот, но дека остатокот од транспортот морал да биде плански изведен од страна на луѓето“, наведе Кларк.
Тој додаде дека ваквиот подуфат барал „детално планирање, координација и длабоко разбирање на теренот, како и исклучителна одлучност“.
Науката сè поблиску до разбирање на Стоунхенџ
Истражувачите истакнуваат дека комбинирањето на геолошките анализи и компјутерските модели помага во разјаснувањето на долгогодишните археолошки мистерии, вклучувајќи го и начинот на кој Стоунхенџ всушност бил граден.
Ова откритие доаѓа во период на засилени археолошки истражувања во Британија, каде што во последните месеци беа пронајдени и други значајни наоди од римскиот период и од праисторијата.
Извор: odrzime.rs
