Понижување на работното место
Бернадет Хејс, која тогаш имала 55 години, работела во градежната компанија West Leeds Civils LTD. Таа пред судот сведочела дека шест месеци, почнувајќи од крајот на 2023 година, била изложена на „непријателско, понижувачко и навредливо“ опкружување.
Таа тврдела дека директорот на компанијата, Мик Аткинс, ѝ довикувал „компир“ со нагласен ирски акцент секогаш кога не се согласувале околу некоја работа. Судот, исто така, слушнал дека однесувањето на Аткинс се влошило откако во компанијата бил вработен уште еден работник, Маркус Смит.
„Се чувствував несигурно“
Хејс изјавила дека поради целата ситуација се чувствувала несигурно и непријатно. Таа опишала дека дури и самата помисла да оди во канцеларија ѝ предизвикувала физичка непријатност, а постојано се плашела дека колегите ѝ се смеат зад грб. Иако на својот шеф му ставила до знаење дека неговите коментари не ѝ се смешни, се двоумела директно да побара од него да престане, бидејќи го доживувала како „страшна и нестабилна личност“.
На судот, исто така, му било предочено дека Хејс во неколку наврати и самата се вклучувала во исмевањето на своја сметка, нарекувајќи се „компир“, но само за да „се обиде да ја олесни ситуацијата“. „Ова целосно ги уништи моето самопочитување и самодоверба“, изјавила Хејс пред судот.
Судска одлука
Трибуналот за вработување во Лидс, со кој претседавал судијата Бакли, делумно го прифатил нејзиното барање за расно вознемирување и виктимизација, додека барањето за расна дискриминација било одбиено. Според Законот за еднаквост на Обединетото Кралство од 2010 година, терминот „раса“ ги опфаќа и националноста, како и етничкото или националното потекло, што значи дека дискриминацијата врз основа на националност се третира како форма на расна дискриминација.
Извор: bizlife.rs
