Замислете да заспиете во Франција, а да се разбудите во Швајцарија. Или пак, брачниот кревет да ви се наоѓа во две држави истовремено. Иако звучи како туристичка атракција од фантазијата, токму вакво искуство нуди хотелот Арбез (L’Arbézie), сместен на неколку километри од Женевското Езеро.
Овој необичен хотел веќе повеќе од еден век привлекува патници од целиот свет, а неговата приказна е исто толку интересна како и самата локација.
Како настана хотелот кој им припаѓа на две држави?
Сè започнало во 1862 година, кога Франција и Швајцарија конечно го решиле долгогодишниот спор околу долината Вале де Дап (Vallée des Dappes). Двете земји тогаш размениле делови од териториите, а новата граница поминала право низ селото Ла Кјур, делејќи одредени парцели и објекти на два дела.
Локалниот претприемач Понтус брзо ја препознал приликата. Пред договорот официјално да стапи на сила, тој изградил трикатница точно на линијата на идната граница. Делот од зградата што ѝ припаднал на Швајцарија го користел како продавница, додека францускиот дел го претворил во бар.
Во 1921 година, објектот го презема семејството Арбез, кое го претвора во хотелот по кој денес е познат ширум светот.
Границата поминува низ собите, ходниците и брачниот кревет
Хотелот имал значајна улога и за време на Втората светска војна. Бидејќи дел од објектот ѝ припаѓал на неутрална Швајцарија, германските војници не смееле да влегуваат во одредени делови од зградата. Тоа овозможило повисоките катови да бидат користени од бегалци и припадници на француското Движење на отпорот.
Денес со хотелот управува четвртата генерација на семејството Арбез, а границата и понатаму се протега низ кујната, трпезаријата, ходниците и неколку соби.
- Апартманот за младенци: Најпознатата соба во хотелот, каде граничната линија минува точно на половина од креветот. Така, едното лице спие во Франција, а другото во Швајцарија.
- Соба и бања во различни држави: Во поединечни соби, креветот се наоѓа на територијата на едната држава, додека за да отидете во бањата, буквално мора да ја преминете границата.
Гастрономски спој: Покрај необичната локација, хотелот е познат и по фузијата на француската и швајцарската гастрономија. На менито се наоѓаат специјалитети од двете земји, па гостите на едно место можат да уживаат во автентичните вкусови од двете страни на границата.
Со само десет соби, прекрасни алпски пејзажи и историја каква што нема ниту еден друг хотел на светот, Арбез е совршен доказ дека границите понекогаш можат да бидат и одлична туристичка атракција.
Извор: bizlife.rs
