Ако локацијата е вклучена, фотографијата добива и прецизни GPS-координати. Тоа значи дека една навидум безопасна слика од домашен миленик или поглед од тераса може, без наше знаење, да ја открие точната адреса на која е направена.
Како апликациите знаат каде сте биле
Апликации како Google Photos и Apple Photos ги користат овие податоци за да ја организираат галеријата, па можете да пребарувате фотографии по градови, патувања или места што сте ги посетиле. Таа функција е практична, но воедно покажува и колку многу информации всушност носат фотографиите.
Доволно е да ја отворите фотографијата и да ги проверите нејзините детали. Често ќе видите мала мапа или координати од местото каде што е направена. Истото важи и на компјутер, каде овие податоци може да се најдат преку основните опции за преглед на датотеки, иако таму најчесто се прикажани посуво, преку бројки наместо на мапа.
Проблемот настанува во моментот кога фотографијата ќе излезе од вашата галерија. Штом ја споделите, веќе немате целосна контрола врз тоа кој може да ги види тие податоци.
Што се случува кога споделуваме фотографии
Добрата вест е што многу платформи автоматски ги отстрануваат податоците за локацијата. На пример, Facebook и слични мрежи често ги бришат GPS-информациите при прикачување. Сепак, тоа не е универзално правило и зависи од апликацијата, поставките и начинот на споделување.
Ако сакате поголема контрола, постојат неколку начини да ги отстраните овие податоци. Во некои апликации можете директно да ја избришете локацијата од самата фотографија, додека во други тоа не е можно без дополнителни чекори. Еден од поедноставните трикови е да ја копирате фотографијата и повторно да ја зачувате, на тој начин, остануваат само пикселите, без дополнителните информации. Постојат и алатки специјално наменети за бришење EXIF-податоци, како ExifTool.
Друга можност е целосно да го исклучите пристапот до локацијата за камерата. Така ќе спречите GPS-податоците воопшто да се зачувуваат, но воедно ќе ја изгубите и можноста подоцна да ги пребарувате фотографиите според места.
Во пракса, сè се сведува на баланс помеѓу практичноста и приватноста. Технологијата ни помага подобро да ги организираме спомените, но истовремено бележи повеќе отколку што често очекуваме. А понекогаш е доволна само една фотографија за да открие многу повеќе од она што сме сакале да го покажеме.
Извор: web-mind.rs
