X, социјалната мрежа која некогаш беше синоним за кратки пораки и политички дискусии, продолжува да ја менува својата суштина. Најновата вест дека платформата воведува можност за прикачување видеа во 4K резолуција, открива јасна насока: X сака да се натпреварува со големите играчи како YouTube, Vimeo и TikTok.
Воведување на 4К поддршка на X мрежата
Досега корисниците можеа да прикачуваат видеа во резолуција од 1080p, со големина до 8GB и должина до три часа. Со воведувањето на 4K поддршката, се очекува овие ограничувања да се прошират, за да се обезбеди доволна техничка флексибилност за содржина што бара повеќе продукциски потреби. Иако компанијата сè уште не објави прецизни технички спецификации за оваа новост, јасно е дека X сè повеќе се свртува кон креаторите на видео содржини, објави Tech Crunch.
Моментално, оваа функционалност е достапна за ограничен број на Premium корисници. Моделот на претплата, кој X претходно го воведе за диверзификација на изворите на приходи, сега се користи и како филтер за воведување нови опции. Креаторите кои сакаат подобар квалитет и поголем досег, сè повеќе избираат платформи што им го овозможуваат тоа, а X очигледно сака да биде на таа листа.
Ова не е првиот чекор на X кон видео ориентација. На почетокот на годината, апликацијата доби посебна кратенка за вертикален видео фид, моделирана според TikTok. Во време кога се зборува за можна забрана на TikTok во САД, X се обидува да преземе дел од тој пазар, нудејќи познат интерфејс, но со дополнителни технички можности.
Поддршката за 4K видео не е само прашање на подобар приказ. Тоа исто така означува посериозни намери. Платформата што некогаш ја ограничуваше содржината на 280 знаци, сега овозможува часови видео со висок квалитет. Тоа е голем пресврт, а прашањето е дали публиката и креаторите ќе го препознаат како нова можност или само уште еден експеримент во серијата. Во секој случај, X не е тоа што беше порано.
Извор: web-mind.rs
