TikTok го лансираше TikTok Shop во Шпанија и Ирска, овозможувајќи им на корисниците да купуваат директно преку социјалната мрежа.
„Оваа услуга ќе им овозможи на корисниците да купуваат производи и да комуницираат со компаниите и креаторите во реално време,“ се наведува во соопштението на компанијата, при што се истакнува дека можноста за продажба на производи е достапна само за компании со седиште во Шпанија и Ирска.
Функцијата за купување во апликацијата официјално е имплементирана во Шпанија, со производи прикажани во дигитални продавници, вклучувајќи електрични фритези и додатоци за здравје, со цени од 3 евра (3,16 долари) до 60 евра, според списокот што TikTok го сподели со креаторите и кој го прегледа агенцијата Bloomberg.
Според достапните податоци, TikTok во Шпанија го користат 20 милиони луѓе месечно.
Од компанијата тврдат дека соработуваат со доверливи платформи на трети страни за плаќање, со цел да обезбедат безбедно извршување на трансакциите. Наведено е дека TikTok планира да ги воведе своите услуги за купување и во Франција, Германија и Италија.
Оваа услуга се покажа како еден од најбрзо растечките сектори на кинескиот сопственик на TikTok, компанијата ByteDance Ltd, а проширувањето на европскиот пазар се смета за обид да се пронајдат алтернативни пазари поради заканата од забрана во САД, доколку ByteDance, со седиште во Кина, не го продаде својот удел.
Извор: Bizlife.rs
