Коалицијата за борба против пиратеријата, која ја сочинуваат претставници на 30 од најголемите американски и светски филмски компании и филмски студија, тврди дека постигнала победа против големиот пиратски стриминг сервис Fmovies, чиј штаб се наоѓа во Виетнам.
Алијансата за креативност и забава (Alliance for Creativity and Entertainment – ACE) соопшти дека во соработка со полицијата на Ханој спровела акција за затворање на Fmovies и поврзаните сајтови кои заедно ја сочинувале „најголемата пиратска стриминг операција во светот“.
Тие во периодот од јануари 2023 до јуни 2024 година имале повеќе од 67 милијарди посети. Покрај Fmovies, станува збор и за сајтовите bflixz, flixtorz, movies7, myflixer и aniwave. Во акцијата е затворен и видео хостинг провајдерот Vidsrc.to и поврзаните сајтови со кои, исто така, „управувал истиот осомничен“, пишува The Hollywood Reporter.
Извор: Pexels
Полицијата на Ханој уапсила двајца мажи во врска со Fmovies сервисот, но против овие Виетнамци сè уште не е подигнато обвинение.
Fmovies започна со работа во 2016 година и оттогаш речиси секој месец имаше 374 милиони посети. Благодарение на тоа, тој стана 11-тиот најпосетуван телевизиски, филмски и стриминг сајт во светот.
Претседателот на Алијансата за креативност и забава Чарлс Ривкин ја нарече акцијата за затворање на пиратските стриминг сервиси „запрепастувачка победа за актерите, филмските екипи, писателите, режисерите, студијата и креативната заедница ширум светот“.
ACE обединува бројни филмски и телевизиски куќи, и во соработка со државни органи и правни тела во САД и странство работи на спроведување на законот во борбата против онлајн пиратеријата.
Главните членови на оваа алијанса се компании како Netflix, Apple TV+, Amazon и The Walt Disney Studios, додека дел од меѓународното членство го сочинуваат BBC Studios, Canal+ Groupe, Televisa, MBC Group и RTL.
