Во ерата на брзи трикови, вирален „рецепт од две состојки“ звучи примамливо, но ваквите кратенки најчесто не го даваат она што луѓето всушност го очекуваат од јапонскиот чизкејк: стабилна, фина структура и препознатлива мекост.
Суштината на овој колач е токму во балансот на две работи – богата база од крем сирење и внимателно изматен шам (меренга), кој му ја дава таа препознатлива леснотија. Затоа „вистинскиот“ јапонски чизкејк бара малку повеќе чекори, но резултатот и по изглед и по вкус го оправдува секој вложен минут.
Вистински рецепт за јапонски чизкејк
За базата:
- 340 g крем сирење (на собна температура)
- 6 големи жолчки (на собна температура)
- спреј за печење (за подмачкување на калапот)
- 150 g млеко (полномасно или 2%)
- 2–3 g свежо исцеден сок од лимон
- околу 65 g фино брашно
За шамот (меренгата) и сервирање:
- 6 големи белки (на собна температура)
- околу 8–10 g вински камен (cream of tartar) доколку немате може да го замените со лимон или вински оцет
- околу 175 g кристален шеќер
- шеќер во прав (по желба, за посипување)
Суво грозје (по желба):
- околу 70–80 g суво грозје
- 30 g рум или сок (јаболко/портокал/бело грозје) или екстракт од рум
Извор: Unsplash
Подготовка
1) База + (по желба) потопување на сувото грозје
Загрејте ја рерната на 175°C. Подмачкајте калап со обрач (23 cm) со спреј, обложете го дното со круг хартија за печење, а однадвор калапот добро обвиткајте го со алуминиумска фолија (најдобро со едно поголемо, поцврсто парче).
Ако користите суво грозје: измешајте го со 30 g рум/сок и оставете да отстои.
Во миксер со жичен додаток изматете 340 g крем сирење и 6 жолчки на ниска брзина додека смесата не стане мазна (околу 3 минути), со стругање на садот на половина од времето.
Додајте 150 g млеко и 2–3 g сок од лимон и матете додека смесата не се изедначи (околу 1 минута).
Просејте околу 65 g фино брашно врз смесата и нежно измешајте со силиконска шпатула. Потоа процедете ја смесата низ фино сито во поголем сад за да ги отстраните грутките. Ставете ја во фрижидер додека го подготвувате шамот.
2) Шам (меренга)
Изматете 6 белки со винскиот камен на средна брзина додека не запенат (околу 1 минута).
Додека миксерот работи, полека додавајте околу 175 g шеќер и матете додека смесата не стане сјајна и не се формираат меки врвови (врвовите благо се свиткуваат) – околу 1 минута и 15 секунди.
3) Спојување + печење во водена бања
Во базата додајте околу 1/3 од шамот и нежно измешајте рачно со жица. Потоа со шпатула вмешајте го остатокот од шамот во две тури, само додека смесата се соедини (не мешајте премногу).
Ако користите суво грозје: исцедете го, распоредете го по дното на калапот, сипете ја смесата и израмнете.
Ставете го калапот во длабок плех и сипете врела вода во плехот до околу половина од висината на калапот (водена бања / bain-marie).
Ставете во рерна и веднаш намалете на 150°C, па печете околу 60 минути без отворање, додека врвот не порумени, а чепкалка од средината не излезе чиста.
4) Ладење и сервирање
Исклучете ја рерната, подотворете ја вратата и оставете го колачот внатре 10 минути.
Извадете го калапот од водата, тргнете ја фолијата и ладете на решетка до собна температура (околу 2,5 часа).
Лесно покријте (да не ја допира површината) и оставете во фрижидер минимум 4 часа или преку ноќ. Отстранете го обрачот и по желба посипете со шеќер во прав. За уредни парчиња: натопете го ножот во врела вода и избришете го пред секое сечење.
Уживајте!
Извор: odrzime.rs
