По повеќе од три децении корпоративно искуство во компании како Coca-Cola, Hershey и Ralston Purina, еден искусен лидер издвојува шест навики што му помогнале да изгради силни меѓучовечки односи, да ги надмине конфликтите и да стекне доверба во различни култури, пишува CNBC Make It.
Неговото искуство од работилница во Москва, каде што требало да ги смири културните разлики, политичките несогласувања и личните тензии меѓу два меѓународни тима, покажува дека големото лидерство всушност се сведува на дипломатија, особено тогаш кога разговорот запира, а тензијата расте.
Во продолжение следат шест едноставни, но моќни принципи за изградба на силни комункациски вештини што ја прават разликата меѓу просечен и исклучителен лидер.
1. Размислете пред да прозборите
„Само затоа што сте помислиле нешто, не значи дека треба и да го изговорите.“ Оваа едноставна мисла носи огромна мудрост.
Најуспешните лидери знаат дека прво треба внимателно да слушаат, да го почувствуваат она што соговорникот навистина го кажува и дури потоа да одговорат. Понекогаш, најдобриот одговор е да нема одговор. Некои мисли, баш како паста за заби, подобро е да останат во тубата.
2. Бирајте ги зборовите промислено
Комуникацијата не е трка. Секоја реченица носи последици, па вреди да размислите неколку чекори однапред, исто како во шахот.
Кинескиот филозоф Лао Це рекол: „Одговарај интелигентно, дури и на неинтелигентен третман.“
Предвидете го исходот на разговорот и избирајте зборови што ве водат кон целта, а не кон конфликт.
3. Останете смирени, дури и кога ве изненадуваат
Непријатните изненадувања се неизбежни. Клучно е да ги препознаете вашите вештини, што најбрзо ве вади од такт и свесно да реагирате смирено.
Лидерите што умеат да останат прибрани во кризни моменти внесуваат доверба. Понекогаш е доволно да земете длабок здив, да направите кратка пауза пред да одговорите или просто да слушате активно.
4. Обратете внимание на говорот на телото
Психолозите велат дека дури 93% од комуникацијата се сведува на тонот и говорот на телото, а само 7% на изговорените зборови.
Луѓето многу повеќе го „читаат“ вашиот израз на лицето, движењата и гласот отколку што мислите. Една насмевка или благ тон можат целосно да го сменат текот на разговорот.
5. Ценете ја различноста во мислењата
Секој има своја перспектива. Добриот лидер знае да постави вистински прашања и да слуша без предрасуди и без навреденост.
Токму во размената на мислења се раѓаат најдобрите идеи и неочекувани решенија. Разбирањето на различните погледи не значи губење на авторитет туку негово надградување.
6. Градете односи, а не само резултати
Во многу култури, па и во руската, односите доаѓаат пред задачите. Довербата и наклонетоста најчесто се градат преку неформални разговори, искрено интересирање и доследност.
Вистинското партнерство во бизнисот не се темели на договори, туку на доверба, а таа најчесто се раѓа во непредвидливи, па дури и непријатни ситуации.
На крајот од денот, лидерството не секогаш се состои од гласни говори и брзи одлуки. Понекогаш најголемата сила е во тишината, трпението и способноста да ги видите луѓето околу себе.
И како што покажува искуството на големите лидери – успехот во бизнисот многу често започнува од една едноставна вештина:
умешноста да се води разговор.
Извор: bizlife.rs
