Создај ментален простор за да го привлечеш она што навистина го посакуваш, а не само она со кое моментално си задоволен. Препознај што те оптоварува и ослободи простор во сопствениот внатрешен свет. Еве како функционира ревизијата на животот, чекор по чекор.
Што е ревизија на животот
Ревизијата на животот е концепт што го прави манифестирањето помалку апстрактно и „магично“, а повеќе практично и опипливо. Мислите сами по себе нема автоматски да се претворат во реалност само преку желба станува збор за усогласување на твоите секојдневни избори со животот што сакаш да го живееш. Не се работи само за начинот на размислување, туку и за постапките, уверувањата и рутините. Но, не можеш да промениш нешто за кое сè уште не си свесен. Токму тука влегува ревизијата на животот.
Како клучен чекор во манифестирањето на посакуваниот живот, темелната ревизија е осмислена да ти помогне да го согледаш секој сегмент од твојот живот таков каков што навистина е домот, финансиите, благосостојбата, менталното здравје, односите без романтизирање или избегнување. Ги препознаваш работите што ти даваат сила, оние што ти ја трошат енергијата и изборите што ги правиш од навика, а не од потреба. Резултатот е расчистување простор за она што го посакуваш и усогласување на секојдневните активности со твоето највисоко „јас“.
Гледај на „уредувањето“ на животот како повторна евалуација можност да застанеш и да видиш каде се наоѓаш во моментов. Кога ќе забавиш и ќе го набљудуваш секој аспект од својот живот без итна потреба да го поправиш, одлуките стануваат полесни и појасни. Можеш да видиш што треба да отпуштиш, а што си подготвен да прифатиш. Јазот помеѓу животот што го замислуваш и оној што моментално го живееш се намалува, а начините да го премостиш се зголемуваат.
Ревизија на животот – чекор по чекор
Чекор 1: Направи пауза за размислување
Ако си личност од акција и полесно ти е да дејствуваш отколку да размислуваш, овој чекор може да биде вистински предизвик. Сепак, ревизијата на животот бара да направиш и нешта што можеби не ти се природни или секогаш пријатни.
Затоа, закажи посветено време без прекини (30 минути, еден час или повеќе) што ќе го поминеш со својот дневник. Не си љубител на водење дневник? Размисли за тоа како форма на манифестирање претворањето на мислите во зборови им дава конкретност и трајност. Тоа е како да си црташ мапа за сопствениот пат, а оваа практика е одличен начин за пронаоѓање на потребната јасност. Дури и краток момент на тишина му сигнализира на мозокот дека процесот е важен.
Во дневникот, оддели шест различни делови за животните категории што ќе ги анализираш: дигитален живот, дом, финансии, благосостојба, ментално здравје и општествен живот.
Потоа, одговори на следните прашања:
- Што сакам повеќе во оваа област од мојот живот?
- Што ми создава чувство на преоптовареност?
- Дали чувствувам блокади што ме спречуваат да ги остварам целите?
- Што сакам повеќе да воведам?
- Од што можам да се ослободам?
- Како би изгледало кога би имал поголемо чувство на внатрешен мир?
Чекор 2: Ревизија на животот преку строга искреност
Пред да започнеш, знај дека овој чекор може да потрае. Станува збор за искреност кон себеси и соочување со она што си го избегнувал, затоа биди трпелив, покажи си разбирање и не брзај нема временски рок.
Ќе забележиш навики, обврски или обрасци што се непријатни или фрустрирачки. Отпуштањето на нешта, простувањето од односи што си ги надраснал или соочувањето со реалната финансиска состојба може да биде тешко и емотивно напорно. Отпорот е нормален, но важно е да запомниш дека свесноста секогаш ѝ претходи на промената.
Чекор 3: Направи конкретни чекори
Откако ќе поминеш доволно време во размислување и водење дневник, избери една област од животот со која сакаш прво да се занимаваш. Почни со она што ти изгледа најлесно така ќе создадеш поголем замав отколку ако веднаш се фрлиш на најтешкиот дел. Користејќи ги одговорите од дневникот како водич, одвои време да ги разгледаш и средиш сите елементи поврзани со таа област.
На пример, ако започнуваш со дигиталниот живот: избриши стари пораки и апликации што ти одземаат време, преиспитај ги контактите, среди ги фолдерите и работната површина. Потоа расчисти го електронското сандаче со одјавување од пораки што ти создаваат стрес или повеќе не се релевантни. Ако сакаш да поминуваш помалку време на социјалните мрежи, обрни внимание на профилите што кај тебе будат анксиозност или споредување и одјави се од нив. Насочи ја енергијата кон активности што ќе ти помогнат да се доближиш до своите цели.
Или, можеби ќе одлучиш да започнеш со расчистување на физичкиот простор и уредување на домот. За некого е полесно прво да се ослободи од вишокот предмети, па дури потоа да започне со „големо чистење“ на менталниот простор.
Секоја ревизија на животот изгледа различно. Тоа е длабоко личен и емотивен процес – некои области може да предизвикаат стрес, додека други ќе те изненадат со својата леснотија. Она што е сигурно е дека на крајот ќе се чувствуваш полесно, поусогласено и посигурно во тоа каде одат твојот фокус, внимание и енергија, додека отвораш ново поглавје од својот живот.
Што по завршувањето на ревизијата на животот?
Всушност, ова не е нешто што се прави еднаш и завршува. Кога ќе ја прифатиш како алатка за манифестирање, ревизијата на животот може да ти биде корисна секогаш кога ќе ти затреба еднаш годишно, како ритуал, или во моменти кога се чувствуваш заглавено, преоптоварено или надвор од својот пат.
Ова не е еднократно решение, туку концепт на рамнотежа што постојано се воспоставува одново. Секоја нова ревизија носи поголема јасност, насока и чувство на контрола врз приоритетите. Додека запознаваш нови луѓе, остваруваш цели и стекнуваш нови искуства, ревизијата станува континуирана практика, начин редовно да се провериш себеси и местото каде што се наоѓаш. Со секоја намерна промена, ќе сфатиш дека веќе го имаш сè што ти е потребно за да го обликуваш животот каков што го посакуваш.
Извор: wannabemagazine.com
