Супермаркетите насекаде си играат со малопродажните цени на дневно ниво. Револтот кај луѓето најмногу доаѓа од аргументите и оправдувањата кои тие ги нудат за скокот на цените при остварување на профитна маргина во малопродажба на храна и пијалоци. Поради овој факт, луѓето во регионот се сложни за бојкот на супермаркети, ресторани, шопинг молови, кафулиња и слично.
Бојкот на супермаркети на 31 јануари
За многу луѓе еднодневниот бојкот на супермаркетите закажан кај нас за петок, 31.01.2025 година, како што велат „нема логика“. Минатата недела во Хрватска еднодневниот бојкот се однесуваше на супермаркети, ресторани, шопинг-молови, кафулиња. Пред некој ден граѓаните на Србија и Црна Гора исто така бојкотираа ланци на малопродажни објекти, а и Словенците се подготвуваат за сличен бојкот. Иако на сите им е јасно дека со еднодневниот бојкот нема веднаш да се сменат работите, сепак очекувањата се дека пораката ќе биде примена од другата страна и дека ќе се делува согласно барањата кои се легитмни, бидејќи не може одговорот за енормното покачување на цени секојдневно да биде инфлацијата.
Која е реакцијата на супермаркетите?
Но, реалноста кај нас денес, еден ден пред бојкотот е сосема спротивна од овие очекувања. Наместо да видиме соодветна позитивна реакција на разбирање од страна на ланците на супермаркети, ние гледаме повторно комуникација на оправдување пред потрошувачите, уште полошо – условување на некој начин да пазарат токму на денот на закажаниот бојкот.
Еден од најголемите супермаркети испрати порака дека има акција на производи со особено ниски цени почнувајќи од 30.01, додека друг симптоматично на ден пред најавениот бојкот, излезе со потсетување до купувачите да си ги искористат поените од програмата за лојалност најдоцна до 31.01.2025 за кога е закажан бојкотот, во спротивно поените ќе им бидат избришани. Во првиот случај цените навистина се толку ниски какви што до сега не сме виделе и важат за деновите околу бојкотот, а вториот е еклатантно погрешен комуникациски потег со порака која предизвикува огорченост кај лојалните купувачи, кои ќе се почувствуваат казнети со бришење на поените само затоа што ете решиле да дигнат глас против високите цени. Дури и ланецот пред бојкотот да имал планирано заокружување на годишниот циклус на програмата за лојалност, можеле да пролонгираат неколку дена наместо вака самите да си нанесуваат репутациска штета и тоа токму кај најлојалните потрошувачи.
И останатите големи ланци на супермаркети во градов не заостануваат зад гореименуваните два, со нивното интензивно промовирање на „најдобри цени“ на нивните канали на социјалните медиуми во изминативе 48ч, откако е најавен утрешниот бојкот на супермаркети.
Криза како можност
Наместо тоа, да постапеа поинаку, да го искористеа овој момент на бојкот и да го свртеа во своја корист настапувајќи со понуди кои имплицираат „ви го слушнавме барањето и ви излегуваме во пресрет“, ќе направеа исчекор кон враќање на довербата кај нивните потрошувачи, па дури и можеби ќе го спречеа евентуалниот бојкот. И придобивките од таа постапка не би завршиле тука, туку би се одразиле во повеќе насоки како зацврстување на влијанието во малопродажбата, задржување на купувачите и стекнување на нови, и сето тоа според пример од книга за успешно деловно работење и грижа кон своите купувачи.
Заклучокот е дека правилната и внимателна екстерна комуникација е клучна за одржување на добри односи со потрошувачите, особено во моменти на криза, како што е бојкот. Наместо занемарување гласот на потрошувачите или реагирање на начин кој предизвикува дополнителен конфликт на кој сведочиме, супермаркетите треба да го искористат овој момент како можност за обновување на довербата. Со понуди кои покажуваат разбирање и спремност за прилагодување, тие можат не само да ги задоволат постоечките потрошувачи, туку и да привлечат нови. Во спротивно, неадекватната комуникација или игнорирањето на потрошувачките барања може да доведе до поголеми штети, кои не само што би го зголемиле обемот на бојкотот, туку и би ја намалиле идната лојалност на клиентите. Добрата комуникација може да биде катализатор за успех, додека погрешната стратегија може да биде погубна и да ги наруши шансите за закрепнување и раст.
