Компаниите ширум светот сè повеќе вложуваат напори транспарентно да го прикажат своето влијание врз животната средина, општествената заедница и етичките стандарди за управување, додека јавноста и регулаторите стануваат сè почувствителни на практиката „greenwashing“ – обид за лажно прикажување на компанијата како еколошки и општествено одговорна. Ова може да доведе до губење на довербата, правни последици и ризици за репутацијата.
Одговорно известување за ESG иницијативите
Известувањето за ESG (Environmental, Social, and Governance) им овозможува на компаниите да ги прикажат своите активности и резултати поврзани со одржливоста и етичкото работење. Меѓународните стандарди за ESG известување, како што се GRI (Global Reporting Initiative) и SASB (Sustainability Accounting Standards Board) ги обврзуваат компаниите да обезбедат точни и сеопфатни информации за нивното влијание врз животната средина, работната сила, локалната заедница и управувањето со компанијата. Според KPMG, во 2024 година, приоритет за многу компании ќе биде усогласување со новите ESG регулативи, вклучително и проценка на „двојната материјалност“ – влијанието на бизнисот врз животната средина и влијанието на одржливоста врз деловното работење (KPMG).
Транспарентното известување не само што помага да се изгради доверба со засегнатите страни, туку и им овозможува на инвеститорите, регулаторите и потрошувачите да донесуваат информирани одлуки. Точното и сеопфатно известување го намалува ризикот од „greenwashing“ и ја покажува вистинската посветеност на компанијата кон вредностите на одржливиот развој.
Одговорен корпоративен маркетинг
Во свет каде што потрошувачите сè повеќе ја ценат еколошката одржливост и општествената правда, компаниите ја препознаваат потребата за јасно комуницирање на своите вредности и достигнувања. Според Deloitte, автентичноста е клучна во корпоративниот маркетинг – компаниите мора да го соопштуваат само она што навистина го прават, без претерување или манипулација со податоци (Deloitte). Маркетиншките пораките што укажуваат на ESG иницијативи треба да бидат засновани на реални резултати и мерења, додека претераните тврдења и бомбастични изјави можат лесно да го нарушат кредибилитетот.
Во пракса, тоа значи дека корпоративниот маркетинг мора да биде во согласност со реалните перформанси на компанијата. На пример, ако компанијата тврди дека користи рециклирани материјали во производството, мора да биде во можност да го докаже тоа со податоци и документација. Транспарентноста е клучна и секоја маркетинг кампања што вклучува тврдења за одржливост треба да биде поддржана со проверени податоци.
Извор: Freepik
Како да се избегне greenwashing?
За да избегнат „greenwashing“, компаниите треба да преземат следни чекори:
Транспарентна комуникација: Компаниите мора да обезбедат јасни, проверливи и конкретни информации за своите ESG иницијативи. Ова вклучува обезбедување на реални податоци за постигнатите резултати и влијанието врз општеството и животната средина, избегнувајќи генерализации или претерани тврдења.
Воспоставување солидна управувачка структура за ESG: Организациите треба да се осигурат дека постои структура во рамките на компанијата која ќе ги следи, проверува и ќе одговара за постигнувањето на ESG целите. На тој начин се намалува можноста за несвесен „greenwashing“ преку маркетинг материјалите.
Следење на регулативите: Компаниите треба да бидат во тек со сите законски и регулаторни барања што се однесуваат на ESG известувањето и транспарентноста. Усогласеноста со релевантните закони и стандарди не само што го намалува ризикот од „greenwashing“, туку и го олеснува долгорочното одржливо работење.
Независна верификација: Трети страни, како што се ревизорските куќи, можат да обезбедат независна потврда за ESG податоците и извештаите. Ваквата верификација им овозможува на компаниите дополнително да го зајакнат кредибилитетот на своите тврдења за одржливост. Според KPMG, ангажирањето независни експерти може да им помогне на компаниите да избегнат ризици поврзани со „greenwashing“ и да го подобрат квалитетот на своето ESG известување.
Едукација на вработените: Внатрешната едукација на вработените за важноста на ESG иницијативите и ризиците од „greenwashing“ е клучна за создавање култура на одговорност. Кога вработените ги разбираат основните принципи на одржливоста и етиката во работењето, полесно е да се постигнат заедничките цели и да се осигура дека сите делови на организацијата работат во согласност со ESG стандардите.
Клучна деловна стратегија
Одговорното известување и транспарентната комуникација за ESG иницијативите не се само законска обврска, туку претставуваат и клучна деловна стратегија која ја гради довербата на потрошувачите, инвеститорите и другите засегнати страни.
Во време кога сè поголем број потрошувачи и инвеститори обрнуваат внимание на одржливоста, компаниите што ги почитуваат високите ESG стандарди и искрено се посветени на одржливи практики имаат можност долгорочно да ја изградат својата репутација и лојалноста на купувачите. Од друга страна, „greenwashing“ може да има сериозни последици за бизнисот – од регулаторни казни до трајно губење на довербата и репутацијата.
Извор: Odrzime.rs
