Секоја година, на глобално ниво се произведуваат повеќе од 1,2 милијарди паметни телефони. Иако нивното производство е скапо и има сериозно влијание врз животната средина, просечниот век на користење на еден телефон е само две до три години по што тој завршува во фиока или, уште полошо, како дел од сè поголемиот глобален електронски отпад.
Но, наместо да собираат прашина, старите паметни телефони би можеле да се пренаменат за еколошки корисни цели.
„Иновациите често не започнуваат со нешто ново, туку со нов начин на размислување за нешто старо, преиспитување на неговата улога во обликувањето на иднината“, вели Хубер Флорес, вонреден професор по сеопфатно компјутерство на Универзитетот во Тарту, Естонија.
Тој е еден од неколкутемина европски научници кои стојат зад новото истражување објавено во списанието IEEE Pervasive Computing.
Како може повторно да се искористат старите паметни телефони?
Претворањето на застарените телефони во микро дата-центри е изненадувачки евтино, доколку знаете како.
Научниците откриле дека потребни се само околу 8 евра за да се заобиколат некои хардверски ограничувања и да се препрограмира уредот. Најпрво ги отстраниле батериите и ги замениле со надворешен извор на напојување, со што се намалува ризикот од истекување на хемикалии во околината.
Потоа поврзале четири стари телефони, ги опремиле со 3D печатени куќишта и држачи, и ги претвориле во функционален прототип подготвен за повторна употреба.
Еколошки примени на старите паметни телефони
Создадениот прототип бил користен под вода, каде што помогнал во следењето на морскиот живот и броењето на различни видови. Вообичаено, за вакви анализи е потребен нуркач кој снима и потоа носи снимки на копно за анализа. Благодарение на овој уред, целиот процес се вршел автоматски, под површината на водата.
Извор: odrzime.rs
Покрај ова, капацитетот на старите телефони за обработка и складирање на податоци може да се искористи и на други начини. На пример, вакви мини дата-центри може да се постават на автобуските постојки за следење на бројот на патници во реално време. Ваквите информации може да се користат за подобро планирање и оптимизација на јавниот транспорт.
Иако ваквите решенија се само капка во морето на проблемите со ископување ресурси, енергетски интензивно производство и е-отпад, тие претставуваат чекор напред кон циркуларен модел на употреба. Истражувањето нуди мал, но значаен начин како да одговориме на сè поголемата потреба од компјутерска моќ, користејќи го она што веќе го имаме.
„Одржливоста не е само заштита на иднината“, вели Улрих Норбисрат, вонреден професор по софтверско инженерство на Универзитетот во Тарту. „Таа е преиспитување на сегашноста – каде што уредите од вчера стануваат можности за утре.“
Извор: odrzime.rs
