MySpace беше лансиран во 2003 година и за кратко време стана едно од најпопуларните места на интернет. Во период кога социјалните мрежи сè уште не беа обликувани од денешните алгоритми и бескрајното скролање, MySpace им даваше на корисниците нешто што подоцна стана реткос, можност сами да го креираат својот простор на интернет.
Корисниците можеа да го менуваат изгледот на профилот, да додаваат фотографии, музика, заднини и различни графички елементи, со што секоја страница стануваше своевиден дигитален потпис на сопственикот.
Посебно место на платформата имаше музиката. Бендовите и изведувачите го користеа MySpace како канал за претставување пред публиката, објавување песни и градење база на фанови, во време кога стриминг-сервисите сè уште не беа доминантни. Платформата беше важна отскочна штица за бројни музичари, меѓу кои и изведувачи како Адел, Лили Ален, Arctic Monkeys и Калвин Харис.
На врвот на својата популарност, MySpace во еден момент беше најпосетуваната веб-страница во Соединетите Американски Држави, пред конкуренцијата, пред сè Facebook, да почне да го потиснува.
Од технолошки феномен до заборавен бренд
Голем пресврт се случи во 2005 година, кога компанијата News Corp го купи MySpace и неговата матична компанија Intermix Media за околу 580 милиони долари.
Сепак, платформата не успеа да ја задржи предноста што ја имаше. Facebook брзо ги привлече корисниците со поедноставен дизајн и поинаков пристап кон поврзувањето на луѓето, додека промените во рамките на MySpace дополнително го забавија неговиот развој.
По неколку години пад на популарноста, News Corp во 2011 година ја продаде платформата на компанијата Specific Media, со учество на пејачот Џастин Тимберлејк. Новите сопственици се обидоа повторно да го позиционираат MySpace како музичка социјална мрежа, но редизајнот од 2013 година не успеа да ја врати некогашната публика.
Новите сопственици сакаат уште еден обид
Браќата Крис и Тим Вендерхук, кои денес стојат зад MySpace, тврдат дека приказната на платформата не е завршена. Во документарецот Myspace на режисерот Томи Авалоне изјавија дека планираат повторно лансирање, но без конкретен датум и детали за тоа како би изгледала новата верзија.
„Сè уште сме сопственици на MySpace и повторно ќе го лансираме, само го чекаме вистинскиот момент“, изјави Тим Вендерхук во документарецот.
Сепак, пред новиот MySpace стои голем предизвик. Пазарот на социјални мрежи денес изгледа сосема поинаку отколку на почетокот на 2000-тите. Корисниците веќе имаат профили на голем број платформи, а своето внимание го делат меѓу Facebook, Instagram, TikTok, X, Threads и други сервиси.
Дали интернетот повторно сака социјални мрежи од „старата школа“?
Враќањето на MySpace доаѓа во момент кога дел од корисниците сè почесто ги критикуваат современите социјални мрежи поради алгоритамското прикажување содржини, преголемиот број реклами и доминацијата на препорачани објави наместо содржини од пријателите.
Токму тоа би можело да биде можност за новиот MySpace – платформа што би се обидела да понуди поинакво искуство, со поголем фокус на личните профили, креативноста и директната комуникација.
Сепак, носталгијата сама по себе можеби нема да биде доволна. Луѓето со задоволство се сеќаваат на времето кога избираа песна за својот профил и рачно ги уредуваа страниците, но денешниот интернет бара повеќе од спомен на минатото.
Враќање на „првиот пријател“?
Посебна симболика за старите корисници има Том Андерсон, коосновач на MySpace и човекот кој стана познат како автоматски „прв пријател“ на секој нов корисник.
Андерсон повеќе не е дел од компанијата и не е вклучен во актуелните планови за враќање на платформата, но неговото име и понатаму претставува едно од најпрепознатливите лица од раниот период на социјалните мрежи.
Дали новиот MySpace ќе успее да го повтори некогашниот успех останува отворено прашање. Засега е сигурно само едно – интернетот сака враќања, но публиката денес многу потешко им дава втора шанса на платформите што еднаш го изгубиле нејзиното внимание.
Извор: webminds.rs
