Интересот што ги поврзува Трамп и Маск
Доналд Трамп изрази скептицизам кон електричните автомобили и субвенциите што ги поддржуваат во текот на неговата изборна кампања и најави планови за укинување на федералните даночни кредити од 7.500 долари за електрични возила, сметајќи дека таквите субвенции ги зголемуваат цените на автомобилите и ги оптоваруваат потрошувачите.
Илон Маск, извршниот директор на компанијата Тесла, истакна дека Тесла не зависи од субвенции за разлика од конкурентите, и дека укинувањето на субвенциите може повеќе да ги погоди другите производители на електрични возила. Маск го поддржа Трамп во текот на кампањата, што според проценките на аналитичарите, имало пресудна улога во неговата победа на последните избори во Америка.
Победата на Трамп ја зголемува неизвесноста и внесува нервоза во одредени сегменти како што се производството на електрични автомобили и генерално во сите области што имаат врска со заштита на животната средина, евтина работна сила и здравје, смета Ненад Бумбиќ, претседател на здружението Заштита на потрошувачите од Чикаго.
„Делумно поради интересите на Маск, Трамп го најави укинувањето на федералната субвенција за купување на електрични автомобили од 7.500 долари. Странски производители како Хјундаи се доведени во непријатна ситуација. Поради политиката на Бајден дека субвенциите се даваат само за електрични автомобили произведени во САД, странски производители инвестираа во нови капацитети во Америка“.
По најавата за укинувањето на субвенцијата од 7.500 долари за електрични автомобили, следи и воведувањето на царини на увозот на компоненти, што практично ќе го оневозможи производството на странски електрични автомобили во САД.
Дополнително, Трамп го најави и прекинот на субвенциите за проширување на мрежата за полнење електрични автомобили, како и укинувањето на уредбата од 2021 година, која го ограничуваше нивото на загадување што можат да го произведуваат SUV возилата.
Другите производители ќе трпат загуби од повеќе милијарди долари
Иако Трамп планира да ги намали или укине субвенциите за електрични возила, тој изјави дека нема ништо против електричните автомобили, но се противи на наметнување на обавезна употреба на вакви возила за сите потрошувачи. Исто така, нагласи дека купувачите треба да имаат слобода на избор помеѓу бензински, дизел, хибридни и електрични возила.
Што се однесува до нивната комуникација, познато е дека Трамп и Маск одржуваат пријателски односи. Маск, како знак на поддршка, му подарил на Трамп Tesla Cybertruck, кој Трамп го прифатил и покрај својата резервираност кон електричните возила.
„Сето ова му одговара на Маск да го зачува приматот кој Тесла го држи, додека странските производители би трпеле загуби од повеќе милијарди долари. Со ова на ум, јасно е зошто производителите на електрични возила даваат неверојатни попусти. Така, сега може Hyundai Ioniq 5, кој чини помеѓу 40.000 и 50.000 долари, да се земе на лизинг за само 159 долари месечно или VW ID.4 за само 149 долари месечно“, објасни Бумбиќ.
Извор: Web-mind.rs
