Еден родител во вторникот ѝ се обратил на популарната апликација за учење јазици преку мрежата X, откако неговиот десетгодишен син ја изгубил серијата што траела повеќе од 300 дена.
„Серијата“ на Duolingo се гради така што корисникот секојдневно се враќа во апликацијата и завршува лекции составени од различни активности налик на игри поврзување поими, вежби за преведување и бројни други задачи.
„Сега е дома и закрепнува, но скршен е поради тоа што ја изгуби својата серија. Има ли шанса Duo да направи малку магија и да му ја врати?“, напишал корисникот со име Sunny Chaos во објава што добила 147.000 допаѓања.
Duolingo брзо одговорил со топла порака, наведувајќи дека им е драго што момчето закрепнува и дека ќе му ја вратат серијата што траела речиси една година.
„Серијата од 301 ден е вратена! Додадовме и малку скапоцени камења, како и Streak Shield“, напишал профилот на Duolingo на мрежата X, споменувајќи уште неколку поволности што ги нуди апликацијата.
Сепак, овој убав гест им ја отворил вратата на десетици други корисници, кои почнале да испраќаат барања и да наведуваат најразлични изговори за да им биде вратена изгубената серија.
„Здраво, господине Duolingo. Минатата недела во неделата бев мамурен и ја изгубив мојата серија од четири дена. Ве молам, помогнете“, напишал еден корисник.
Друга корисничка, која се претставила како Destiny, побарала од Duolingo да ѝ ја врати серијата на нејзината сестра, која траела речиси три години.
„Мојата сестра беше навистина вознемирена поради тоа што оди на крстосување и што ќе ја изгуби својата повеќегодишна серија“, напишала таа.
„Можете ли, ве молам, да ѝ ја вратите, да ме направите најкул сестра на светот, па повторно да ја започнеме нашата пријателска серија?!“
Компанијата ѝ излегла во пресрет и ја вратила серијата од дури 1.032 дена.
Голем дел од содржините на Duolingo на мрежата X инаку се шеговити објави, мемиња и духовити одговори на корисниците. Други корисници ја искористиле можноста по овој љубезен потег на компанијата да испратат свои, помалку или повеќе неверојатни барања.
Сепак, Duolingo не прифатил баш секое од нив. Еден корисник се пожалил дека поради недостиг на тоалетна хартија ја пропуштил својата дневна лекција.
„Господине Duolingo, можете ли да ми ја вратите серијата од 67 дена? Заглавив во тоалетот, а ми снема тоалетна хартија, па не можев да ја завршам лекцијата“, напишал тој.
Компанијата одговорила дека има совршено решение и споделила фотографија од тоалетна хартија брендирана со Duolingo.
Duolingo е лансиран во 2012 година и денес е препознат како најголемата апликација за учење јазици во светот. Нуди повеќе од 280 курсеви за 42 јазици.
Извор: webmind.rs
