Законот има за цел да им овозможи поголема слобода на корисниците при изборот и користењето апликации, и би можел сериозно да го наруши постојниот бизнис модел на овие компании.
Ако биде усвоен, App Store Freedom Act ќе бара од операторите на продавници за апликации со повеќе од 100 милиони корисници во САД да овозможат инсталирање на алтернативни продавници за апликации, како и можност тие да бидат поставени како стандардни. Покрај тоа, законот предвидува и користење на алтернативни системи за плаќање, со што развивачите би можеле да ги избегнат високите провизии кои Apple и Google моментално ги наплатуваат.
„Овој закон е чекор кон враќање на контролата кај корисниците и отворање на пазарот за развивачи кои сакаат да ги понудат своите апликации директно на корисниците без посредници,“ изјави Кемек. „Големите технолошки гиганти повеќе нема да можат да го задржат монополот врз дистрибуцијата на апликации,“ пренесува The Verge.
Дополнително, законот бара корисниците да имаат можност да ги отстранат или сокријат однапред инсталираните апликации, а развивачите да имаат еднаков пристап до сите интерфејси и алатки за развој, без дополнителни трошоци или дискриминација. Со спроведувањето на законот би управувала Федералната трговска комисија (FTC), која би имала овластување да изрекува казни до еден милион долари по прекршок.
Притисокот расте: ЕУ веќе бара алтернативни продавници – дали САД ќе го следи примерот?
Овој предлог – закон доаѓа по слични регулаторни измени во Европската унија, каде Digital Markets Act (DMA) веќе го принуди Apple да овозможи алтернативни продавници за апликации и користење на други системи за плаќање. Иако Apple сѐ уште не ги имплементирал овие промени целосно, враќањето на апликации како Fortnite на iOS платформата стана можно токму поради DMA регулативата.
Сепак, критичарите на App Store Freedom Act предупредуваат дека законот би можел да отвори врата за потенцијални безбедносни ризици, бидејќи корисниците би можеле да инсталираат апликации од извори кои не се доволно проверени. Apple и Google претходно ги бранеа своите затворени екосистеми токму со аргументот дека така ги штитат корисниците од малициозен софтвер. Сепак, многу развивачи и организации за заштита на потрошувачите ја поддржуваат оваа иницијатива, сметајќи дека отворањето на пазарот би довело до пониски трошоци и подобра конкуренција.
Извор: web-mind.rs
