Планинска куќа за која долго се сомневало дека е на Гауди
Станува збор за објектот Xalet del Catllaràs, планинско одморалиште сместено во масивот Катљарас, недалеку од местото Ла Побла де Лилјет, околу 100 километри северно од Барселона.
Иако оваа градба со години се споменуваше во стручната литература и локалните водичи, таа никогаш не беше официјално вврстена во опусот на Гауди. Тоа се промени по истражувањето предводено од Галдрик Сантана Рома, директор на Катедрата Гауди при Политехничкиот универзитет во Каталонија.
Анализата на архивската документација и споредбата со познатите проекти на Гауди ги доведоа истражувачите до заклучок дека авторството е „објективно и недвосмислено“ потврдено.
Врската со Гуељ и рудниците за јаглен
Нарачувач на проектот бил Еузеби Гуељ, индустријалец и еден од најважните соработници и мецени на Гауди. Одморалиштето било градено меѓу 1901 и 1908 година за потребите на инженерите ангажирани во блиските рудници за јаглен.
За разлика од неговите монументални проекти во Барселона, оваа градба прикажува нешто попоинаку лице на славниот архитект. Куќата е прилагодена на планинското опкружување, со стрмен покрив, камени ѕидови и поедноставен изглед, но во нејзината конструкција и понатаму се препознаваат карактеристичните елементи на Гауди, како што се параболичните лакови и специфичните просторни решенија.
Зошто Гауди никогаш не го потпишал овој проект?
Истражувачите веруваат дека причината поради која објектот никогаш не му бил официјално припишан на Гауди е фактот што архитектот не ја надгледувал лично неговата изградба. На почетокот на 20 век тој бил ангажиран на бројни големи проекти, па дел од работата им ја препуштил на своите соработници.
Бидејќи изведениот објект не одговарал во целост на првобитните нацрти, Гауди веројатно не го сметал за свое завршено дело, што во тоа време било честа пракса меѓу архитектите.
Локалните жители го знаеле ова со години
За жителите на местото Ла Побла де Лилјет оваа вест не претставуваше големо изненадување. Многумина од нив со години верувале дека токму Гауди е авторот на необичната планинска куќа скриена меѓу шумите на Пиринеите.
Каталонските власти сега ја разгледуваат можноста објектот да биде претворен во планинско засолниште и туристичка атракција, со што би се обезбедила негова заштита и зачувување за идните генерации.
Извор: bizlife.rs
