Со поддршка од Националниот центар за исчезнати и експлоатирани деца, Министерството за внатрешна безбедност на САД, непрофитната организација Thorn и други партнери, овој курикулум има за цел да ги зајакне младите во препознавањето на ризични ситуации и пријавувањето на сомнителни активности.
Како функционира курикулумот?
Програмата е прилагодена на наставните планови и може да се користи во училишта или во едукативни работилници. Содржи детални планови на лекции за наставниците, сценарија од реалниот живот и алатки за дискусија на чувствителни теми во безбедна средина.
Една од клучните цели е младите да разберат како потенцијалните предатори се претставуваат на интернет и кои сигнали треба да ги препознаат за да избегнат опасни ситуации. Дополнително, посебен дел од курикулумот е посветен на тоа како тинејџерите да реагираат ако се најдат во ситуација во која некој се обидува да ги искористи, вклучувајќи чекори за пријавување и барање помош.
Meta ја засилува заштитата на тинејџерите
Ова не е првпат Meta да воведува мерки за заштита на малолетните корисници на своите платформи. Instagram минатата година воведе автоматско замаглување на експлицитни слики испратени до малолетници, ограничи правење на снимки од екранот на пораки што исчезнуваат и воведе нови алатки за борба против сексторзијата.
„Иако правиме сè што можеме за да бидат нашите платформи побезбедни, веруваме дека едукацијата и зајакнувањето на младите се клучни во борбата против онлајн експлоатацијата“, изјави Антигона Дејвис, глобалната раководителка за безбедност во Meta.
Извор: Freepik
Дали се овие мерки доволни?
Додека компании како Meta вложуваат во едукација и безбедносни алатки, законодавците во САД сè почесто предлагаат закони што би го ограничиле присуството на децата на интернет. Актуелните предлози го вклучуваат Законот за безбедност на децата на интернет (Kids Online Safety Act), Законот за заштита на приватноста на децата на интернет (COPPA 2.0) и Законот за забрана на социјалните мрежи за деца (Kids Off Social Media Act), кој предвидува целосна забрана за отворање профили на социјални мрежи за деца помлади од 13 години.
Сепак, критичарите нагласуваат дека ниту едукацијата, ниту законската регулатива нема целосно да ги елиминираат интернет-заканите. Според нив, клучот е во континуиран дијалог меѓу родителите, наставниците, компаниите и законодавците.
Дали Meta и Childhelp навистина ќе успеат да им помогнат на тинејџерите да се заштитат или ова ќе биде само уште една иницијатива што ќе остане на хартија? Останува да видиме како ќе се примени курикулумот во пракса и колку училишта навистина ќе го користат.
Извор: Web-mind.rs
