Голем број фишинг е-пораки секојдневно стигнуваат до корисниците. Иако најчесто завршуваат во спам-папката, бидејќи денешните безбедносни системи лесно ги препознаваат и ги пренасочуваат во несакана пошта (понекогаш заедно и со некоја легитимна порака), голем број успеваат да ги измамат корисниците и да ги наведат да отворат линкови што ги содржат, а потоа да ги внесат своите приватни податоци.

Повеќето луѓе веќе имаат слушнато за „фишинг“ напади, а оние помалку претпазливи веќе ги почувствувале и нивните штетни последици. Фишингот вклучува измамнички мејлови или пораки кои ги наведуваат корисниците да кликнат на линкови до фајлови или веб-страници што содржат малициозен софтвер. Вишингот функционира поинаку – тој користи вербални измами за да ги убеди луѓето да направат нешто што мислат дека е во нивен најдобар интерес. Често, вишингот продолжува таму каде што фишингот запира.