Нордиските земји не се осамени на врвот – Данска, Исланд, Швајцарија и Норвешка исто така редовно се наоѓаат при самиот врв на глобалните ранг-листи за среќа.
Според зборовите на Илaна Рон-Леви, извршна директорка на компанијата Gallup, заедничките карактеристики на овие земји вклучуваат економска стабилност, силни политички институции и сеопфатни системи за социјална заштита, пренесува CNBC.
Сепак, Рон-Леви истакнува дека Финска е особено интересна благодарение на широко распространетата доверба во општеството, оптимизмот во врска со иднината и извонредните мрежи на социјална поддршка, кои се клучни фактори за финската среќа.
Извештај за светска среќа 2025
Извештајот за светска среќа за 2025 година се темели на самооценката на граѓаните за задоволството од животот во периодот од 2022 до 2024 година, како и на нивните одговори на т.н. „Кантрилово прашање на скалата“ на Gallup, кое од испитаниците бара да го оценат квалитетот на својот живот на скала од нула до десет.
Во извештајот се земаат предвид и други клучни показатели, како што се БДП по глава на жител, општествената поддршка, очекуваниот животен век во здравје, индивидуалните слободи, дарежливоста и перцепцијата на корупцијата.
Финска особено високо котира во областа на здравствената заштита – владата обезбедува универзален пристап до квалитетни медицински услуги по минимална цена или целосно бесплатно. Овој систем вклучува и широко достапна поддршка за ментално здравје, што ја одразува посветеноста на Финска кон намалување на стигмата и зајакнување на благосостојбата.
Здрав начин на живот и доверба во институциите
Граѓаните на Финска значително профитираат од здравиот начин на живот, кој е поттикнат од чистото природно опкружување и социјалните политики што обезбедуваат широка поддршка – вклучително и дарежливо родителско отсуство и ефикасни иницијативи за рамнотежа меѓу работата и приватниот живот.
Високото ниво на доверба во државните институции дополнително го зајакнува чувството на сигурност и заедништво меѓу населението.
Отвореност во изразување на емоциите
Отвореноста во изразувањето на емоциите исто така ја издвојува Финска.
Мари Лариваара од организацијата MIELI Mental Health Finland нагласува дека Финците се подготвени отворено да ги споделуваат животните предизвици, а истражувањата постојано покажуваат дека таквиот пристап води кон подобро ментално здравје и посилни општествени врски, пренесува Huffington Post.
Финската култура става акцент на слободното време, опуштањето и смислените активности, со универзален пристап до природните ресурси како што се шумите, езерата и крајбрежјето, каде што луѓето можат слободно да уживаат во активности како планинарење, пливање и кампување.
Личен развој и заедништво
Земјата исто така активно го поттикнува личниот развој преку широка достапност на поволни образовни и рекреативни активности, што придонесува за личен раст и зајакнување на заедницата.
Според зборовите на Јухо Саари од Универзитетот во Тампере, финската среќа не е врзана за интензивни моменти на радост, туку за доследно, општо задоволство од животот.
Професорката Мирка Хинтанен од Универзитетот во Оулу додава дека, иако личните ставови имаат значење, надворешните услови, општествената средина и државните политики пресудно го обликуваат нивото на среќа на поединецот.
Извор: bizlife.rs
