Преку својата работа како комуникациски коуч, Мејсон забележала шаблон кој го нарекува „синдром на наметнување“: многу професионалци, особено жени, премногу се свесни дека не сакаат да „сметаат“ или да „бодат во очи“ на работа, што често доведува до тоа да молчат и да ги потценуваат сопствените успеси.
Овие навики на самопонижување имаат „подмолен ефект врз нивната работа и професионалниот углед“, вели Мејсон.
„Тоа води кон потценување на самите себе и на сопствената работа“, додава таа.
Целта на Мејсон со истакнување на овие комуникациски шаблони не е да укаже „на сè што правиме погрешно“, туку да понуди ресурси на лидерите, особено на жените, кои сакаат да ги променат своите комуникациски навики.
„Тоа е повеќе како љубезно признавање: ова постои, и ако не ви користи, можеби ќе сакате малку да експериментирате“, вели Мејсон.
Таа ги споделува своите главни сознанија во својата прва книга Powerfully Likeable: A Woman’s Guide to Effective Communication, (прев. Моќно допадлива: Прирачник за жени за ефективна комуникација) објавена минатиот месец. Еве три фрази кои Мејсон препорачува сите професионалци да ги избегнуваат на работа, заедно со подобри алтернативи:
„Ми треба само секунда..“
Луѓето кои ја користат оваа фраза често сакаат да изразат „многу љубезен, емотивно свесен импулс“ за да покажат почит кон времето на другите, објаснува Мејсон. Но во реалноста, започнување на разговор со „Ќе трае само секунда“ може да има спротивен ефект.
Прво, „поставувате очекување кај другата личност дека тоа ќе биде многу брзо“, вели таа, но „ништо навистина не трае секунда“. Давање нереален временски рок може да ја иритира или разочара другата страна.
Покрај тоа, фразата создава впечаток дека она што го имате да го кажете е минорно или неважно, што може да ја потцени вашата вистинска порака. Подобар начин е:
„Планирам да одвојам еден час следната недела за да разговараме за А, Б и Ц. Ве молам јавете ми дали тоа време ви одговара.“
„Одеднаш звучам како да доаѓам со нешто сериозно и вредно, што го оправдува нашето време“, вели Мејсон за CNBC.
„Нема врска ако не можеш“
Оваа фраза често се користи за да се „омекне“ директно барање, но обично не е сосема точна.
„Често станува збор за итна работа“, вели Мејсон. „Ретко кога поставуваме барање и навистина мислиме: ‘Ќе видиме дали ќе се јават.’“
Кога велите „Нема врска ако не можеш“, испраќате порака дека вашето барање е со низок приоритет, што може да доведе до тоа да не се сфати сериозно.
Наместо тоа, Мејсон препорачува да ја прецизирате целта и временскиот рок на барањето. На пример: „Би била благодарна ако можете да ги испратите вашите измени до попладне, бидејќи конечниот нацрт е предвиден за утре.“
Таа потсетува дека една психолошка студија од 1970-тите покажала дека луѓето почесто исполнуваат барање ако им се даде причина зошто тоа е важно.
„Не сум експерт, ама…“
Оваа фраза веднаш го намалува вашиот кредибилитет. Со тоа што ќе кажете „Не сум експерт“, си го намалувате авторитетот и испраќате сигнал на несигурност: „Веднаш ви се намалува статусот“, објаснува Мејсон.
Луѓето често ги потценуваат своите достигнувања кога се чувствуваат несигурно, особено ако се чувствуваат „издвоени“ во групата. Без разлика дали сте најмлади во просторијата или нови во компанијата, „таквата нерамнотежа прави да бидете хипер-свесни“, вели таа.
Свеста за своето место во професионалната хиерархија не е нужно лоша, но наместо да ја намалувате сопствената вредност, подобро е да ги прифатите уникатните квалитети кои ги носите.
„Не сте вработени затоа што имате иста експертиза како потпретседателот или извршниот директор. Вработени сте поради сопствената експертиза.“
Ослонувањето на своите силни страни може да биде „навистина ослободувачко“, додава таа. „Кога ќе сфатите дека тоа е причината зошто сте вработени и вредноста што можете да ја донесете, тоа ви помага да се ослободите од голем дел од анксиозноста поврзана со хиерархија и статус.“
Извор: bizlife.rs
