Слабите приноси во Гана и Брегот на Слоновата Коска, најголемите светски производители на какао, доведоа до глобален раст на цените на чоколадото во изминатата година. Но, каде потрошувачите во ЕУ го почувствуваа најголемиот ценовен удар?
Полска се најде на првото место со зголемување од дури 39,1% во мај оваа година, во споредба со истиот период минатата година.
Според податоците на Евростат, цените ширум Европа во мај во просек биле повисоки за 21,1% во споредба со една година претходно. Меѓу земјите со најизразено поскапување се издвојуваат Естонија (+37,9%), Литванија (+36,5%), Летонија (+33,2%), Шведска (+28,0%) и Финска (+26,0%).
Од друга страна, растот на цените бил значително поблаг во Луксембург (+5,2%), Кипар (+9,0%), Италија (+12,0%), Малта (+12,2%) и Австрија (+13,4%).
Какаото, кое некогаш се продавало за меѓу 2.000 и 3.000 евра по тон, во одреден период достигна и до 13.000 евра по тон. Аналитичарите очекуваат цената до крајот на годината да се стабилизира на околу 9.000 евра.
Во сезоната 2023/2024 глобалниот пазар на какао бележеше пад на производството. Меѓународната организација за какао процени дека производството опаднало за околу 10% во споредба со претходната сезона.
Стручњаците ја посочуваат комбинацијата од повеќе фактори: лоши временски услови, обилни врнежи проследени со подолги сушни периоди, климатски промени, но и болести кои ги напаѓаат насадите во западна Африка.
Проценките на пазарните аналитичари покажуваат дека дефицитот во снабдувањето со какао, разликата меѓу побарувачката и она што пазарот може да го понуди, достигнал 478.000 тони во сезоната 2023/2024, што е најголем дефицит во последните 60 години.
Растечките цени на какаото доведоа до невидена инфлација на цените на чоколадото, што дополнително ги оптовари производителите на чоколадо и во Европската унија, и ширум светот.
Извор: bizlife.rs
