По контроверзата од минатата година, овој глобален гигант и оваа зима ја лансираше својата традиционална божиќна реклама создадена со помош на AI технологија. Спотот, кој е дел од култната кампања „Holidays Are Coming“, носи носталгични мотиви на камиони, снежни пејзажи и Дедо Мраз, но овој пат – без луѓе. Во центарот се животни со изразени лица кои, заедно со осветлените Coca-Cola камиони, го дочекуваат духот на празниците.
Како и претходните години, зад рекламата стои AI студио Secret Level од Лос Анџелес, кое визуелите ги генерираше користејќи напредни модели на машинско учење. Според основачот на студиото, Џејсон Зада, процесот вклучувал тим од 20 луѓе кои давале инструкции, реституирале и доработувале слики генерирани од системот врз основа на илјадници претходни визуели. Класичниот пристап за изработка на реклама би барал тим од најмалку 50 луѓе. Ова отвора прашање кое сè почесто се поставува во рекламната индустрија: што се случува со креативноста кога алгоритамот станува нејзина главна алатка?
AI како соработник или конкуренција за креативците?
Во соопштението на компанијата, Пратик Тахар, глобален потпретседател и шеф на одделот за генеративен AI во Coca-Cola, нагласува дека музиката во рекламите е дело на вистински музичари и пејачи. Сепак, визуелниот дел од приказната целосно го создала вештачката интелигенција, секако со човечки надзор, но без традиционални уметници и аниматори.
За многумина во индустријата, ова е симбол на промената што ја носи AI: помали тимови, побрза продукција и целосно нова естетика на рекламите. За други, тоа е причина за загриженост, бидејќи генеративните модели веќе го заменуваат работењето на илустратори, дизајнери и аниматори, додека границата помеѓу „човечката“ и „машинската“ креативност станува сè потенка.
Токму затоа Coca-Cola кампањата не останува незабележана: таа е истовремено демонстрација на моќта на новите технологии и потсетник колку брзо се менува природата на креативната работа.
Нов стандард во рекламирањето?
Вештачката интелигенција повеќе не е експеримент во маркетинг светот, туку станува алатка што сè повеќе брендови ја користат за визуели, слогани и персонализирани пораки. Сепак, Coca-Cola се смета за еден од пионерите кои го користат AI во најемоционалните кампањи – оние што традиционално биле „резервирани“ за човечката топлина и автентичност.
Затоа, овогодишниот спот не е само приказна за Дедо Мраз и празниците, туку приказна за новата ера на рекламирање, во која машините не само што им помагаат на креативците, туку стануваат нивни рамноправни партнери. Или, за некои, нивни тивки наследници.
Извор: web-mind.rs
